Image for post
Image for post

喂,寫呢篇嘢100%唔係想踩多腳(有呢個期望嘅人會好失望),200%唔係幫佢講好話(佢今日所受嘅一切係完全值得擁有),係因為一個經歷令我有寫呢篇文嘅念頭,係咩經歷呢?話說日前,同幾個同事傾開,點解倫伯會出嚟撐警?幾位同事不約而同話係因為錢,只有我唔同意。

喂喂喂,倫伯真係已經好有錢架喇,係億億聲身家果隻,當然你可以話錢無人會嫌多,而我,係嘗試代入佢嘅內心世界去諗。

首先,倫伯,真係一個阿伯嚟喇!下個月佢就69歲喇,係一個不折不扣嘅老翁,你估佢真係廿五歲咩?而且,佢係一個有過億身家嘅老翁,一個唔駛迫巴士、唔駛入港鐵站、立法會有冇人DQ都冇所謂(因為同佢有共同利益嘅人係永遠唔會DQ)、大陸對佢嚟講係只有好處冇壞處嘅阿伯,咁樣嘅人,睇嘢同我輩小市民有相反角度,好奇咩?大把人兩父子都一個黃一個藍啦!

就以「大陸」呢個概念嚟講,政治以外,我地體驗緊嘅係通街畀拖筴人迫爆,入醫院要同大陸人爭,學位同福利又要同佢地爭,連樓價都畀土豪炒到全地球最高,至於倫伯,佢係完全無機會體會,佢去親大陸開show、踢波、做慈善,仲有...(嗱有冇其他我真係唔知),永遠只睇到大陸最美好一面,衣食住行都係五星級,人人當佢巨星咁款待,唔通佢會親眼見到王全璋點樣被迫害咩?呢位阿伯嘅價值觀同好多公公婆婆一樣係好合理,佢地吸收新聞嘅途徑都係差唔多,見到暴力場面,覺得示威者就係暴民,而警察打暴民就係天經地義,衝突背後嘅深遠原因who care ? 所以,我相信倫伯係真心為警察站台,唔關錢事。

我地可以從佢性格同人生經驗去分析:

譚詠麟係一個乘住香港60,70年代經濟起飛而走紅,到80年代成為超級巨星嘅典範。根據佢自己所講,當佢由台灣返香港個人發展時,有新歌派台時,佢會全日守喺港台canteen,親自推介新歌去打動每一個DJ,佢就係一個靠自己努力不懈而成功嘅人,換另一個講法,就係跟住世界嘅遊戲規則去玩而最終贏咗嘅人。所以,佢見到依家有年青人唔依遊戲規則玩,自然嗤之以鼻(世上太少人擁有倪匡嘅睿智喇),佢亦當然唔知,今日同佢當年嘅世界已經變到唔認得啦;

譚詠麟係一個喺娛樂圈浸淫近五十年嘅資深藝人。娛樂圈,並唔係社會嘅縮影,佢只係一個江湖嘅縮影,應該話,娛樂圈就係一個江湖。江湖比社會有更多潛規則、更多利害關係、更多嘅身不由己,但對成個社會係唔會有咩大局觀,而留喺呢個圈越耐嘅人越相信呢一套,而一班咁樣背景嘅人互相認同之下,盲點只會越來越鞏固。

對政治抱保守態度同支持建制立場嘅藝人好多,但行上何君堯所搭嘅台上,公然撐警察嘅藝人得兩個,點解倫伯會係其中一個?佢喺台上其中兩句說話可圈可點:「我唔係講政治,我係講正義。」呢個我相信真係佢內心嘅諗法,雖然兩句裡面,每一句都係錯,但我估佢嘅意思係:無論你政治立場係點,都應該覺得警察係值得支持嘅一方。其實呢,倫伯一直以來都係「為善不甘後人」,經常以「校長」身份去撐後輩,我真心相信佢主觀意願係良好嘅,效果係點又另一回事。今次佢忍無可忍,企出嚟撐另一班「後輩」,完全係符合一貫嘅性格設定,況且,佢唔係未試過站台,佢就曾經為董建華爭取連任站台,佢並唔係忽然撐建制(梁家輝先係),我亦相信當時佢都唔係為錢。

當然,相近背景嘅人唔等於只有一個想法,一樣有資深又上岸嘅藝人唔撐警察,呢個自然同學識、修養、同理心,或者良知有關。

至於點解阿B都上台?呢個係另一個問題,佢經過破產後身家成疑,行事為人作風亦唔似倫伯咁有跡可尋,所以我無意見。

寫咗咁多,其實仲有一個「初心」:我好憎人地話參加反送中遊行有錢收、好憎人地話佔中又係有錢收,但換咗位置之後,我地又會話去撐警係一定有錢收,連億萬富豪譚詠麟都係為錢,咁我地有冇設身處地諗下唔同立場嘅人個心諗乜?如果我地想感染唔同立場嘅人,係唔係首先要試下用對方point of view諗嘢呢?每逢議會選舉,有咁多選票支持建制派,你估全部都靠蛇齋餅糭嗎?如果但凡解釋唔到就話係錢作怪,我地又點可以打破自己嘅同溫層?

相關文章:

《為自由》曲未終人已散

Written by

朱米高,傳媒人,基督徒,曼聯迷,識少少音樂,中了80,90年代的廣東歌毒,每天筆錄每一首廣東歌印象,風雨不改,希望寫一千篇。

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store