我個人早已奉《廣播道Fans殺人事件》為經典唱片，其中一個原因，是軟硬天師由對上一張大碟《車欠石更》表現大躍進，題材深入社會和政治、歌曲在無厘頭和攪笑中更見深度，令人有所思考。不過，有一首例外。
大碟第一首派台作品是《老人院》。（以下純靠記憶，有錯請指正）本來，歌曲以日文原版的歌名《Gala Gala Happy》面世，但很快就改名成《老人院》，並成為電台節目《老人苑時間》的主題曲。我和很多當時的年青人一樣，是該節目的fans，逢星期六晚十一晚準時收聽，在夜閑人靜時偷偷笑，其中玩電話環節，更在日後跟朋輩回味再回味。另方面，我覺得歌曲起初的編曲是跟後來有所不同，原本是以真樂器伴奏的J-pop，後來才成為較電子版本，但我不能確定 ~ 大佬呀！已經是26年前的事了！
《老人院》的歌詞跟老人完全風馬牛不相干，不過在無厘頭的旗幟下，甚麼都不重要。《老人院》歌詞全是當時(1993年)的潮流文化符號，但思路全無邏輯可言，絕對雜亂無章，前文不對後語，不過又真的幾好笑。繼有電視主題曲歌詞『夠鐘喇 睇電視 睇下今集講乜先 講乜先』（《卡拉屋企》）、西方音樂潮流的『Marky Mark夠英 Hammer直頭勁 New Kids無動靜』、時裝類的『Nike』、『Harley』、『Champion』、描述打機的『四蚊一鋪街機亂咁打打打凹左 Ken哥將軍手刀射錯咗 今晚三點尖東海邊吸住春麗 我最怕佢有咗』，和社會現象類的『七間金鋪 一粒差佬日日咁捕』等，不能盡錄。
同時，中間更夾雜一些更無厘頭、完全不能解釋的字句，例如：『包起七個桔 三件用嚟窒 孖公仔最核突』、『衰佬死佬差佬基佬做做係咁做
世界事太美好』，還突然大叫幾聲『葉玉卿』和『劉錫明』。朋輩間曾認真地嘗試拆解當中的含義，但都不會有確定答案。我記得曾有聽眾寫信去《老人苑時間》，問兩位主持，究竟『天矇光唱歌fans熱情和 姑丈向下墜』一句，是否指：
「天矇光（黎明）唱歌
fans熱情和
姑（梅姑姑）丈（譚校長）向下墜？」
軟硬當然沒有正經解答。
相關文章:
